John 5

Jisas kako mijo ayo we'e Mpetesɨta sopo hwe mnokino'njo sohumo wopɨngo umokumentisofoho.

1Oso moi'wo imo'nɨngkahonɨngki a'amu Jutafe Sɨkuno Engo iyoho humayo'ne i'mofopahonɨngki Jisas Jelusalemne'no sɨmentisofoho. 2Oso ango Jelusalem sokilojo kuso anga'no yahusipsipmnefoho lɨmotofofoho. Oso hopo sopo mijo ayo we'e wo'nnyoponoho. A'amu Jutafe hungkuno ole Mpetesɨta. Oso hopo sopo ango aho anga'no hopi'nono swoho ane iku'yo'nohinomo'nnyoso loho'nnyoponoho. 3Oso ango hopo sopo a'amu pi'nɨngo engo mnokino'njoso humamotofofoho. Fehohnjoso tɨmpi'nyo fehohnjo sɨfe wonyo'njo fehohnjo a'apaho poyo pe'nnyo'njo oso a'amuso humamotofofoho. [Hofɨko oso mijo ayo we'e huhwo sohwo songo songo iyo'ne hontohumamotofofoho. 4Hwapɨngoso sɨkuno fehohnjo Anɨtuye a'amu ahwomomjo fihwo noponto mijo ajwomo'mo songo songo imokahonɨngki uhwonontɨfi a'amu mnokino'njo sohwo kako oso mijo somo sɨmo'mo ho'nɨma'mentiso osohwo kakoe mnokinoso moi'wo imo'nɨmentisofoho.]

5Oso hopo sopo hwe mnokino'njo fihwo nohumentanɨngki soswoteti-et (38) uyakolo'mojo hweho. 6Jisas noponto oso hwe huhwo sohwo fosyowentanɨngki uhwononto huno ole umento, olo hwe lohwo mnokino hohonta umojo hweho. Ose syafɨsyonto ulɨmento, Kɨko nje a'apaho wopɨngo wanɨmo'nono lakinɨngkohoho. 7Ose ulohonɨngkahonɨngki a'amu mnokino'njo sohwo ulɨmento, Ou, hwe engofo, oso mijo songo songo yahonjo sohonta ngko a'amu nontomafɨkuji mijomo menɨhumajone a'amuso ane hwo'nyoho. Ngko waho'nu'mo'mo ko lontnneso nom'ne a'amuso niyakolofɨwo'nɨngkohofo hwo'nyoho. 8Ose ulahonɨngki Jisas ulɨmento, kɨko nolɨkafohoji jɨje ife ho'yango yo'mayoso hu'memahoji hano mpano. 9Ose ulahonɨngki nɨhu'no komo'no oso hwe sohwoe a'apaho wopɨngo imo'nɨngkahonɨngki kako nolɨkafonto kakoe ife yo'mayoso nohu'memanto kako hano umentisofoho. Oso sɨkuno hiso sɨkuno iyoho humayomnoho.

10Oseso a'amu Jutafe hwe engo sohwa hofɨko oso hwe wopɨngo umokumentiso sohumo ulɨmentohofi, Olo sɨkuno loso iyoho humayo'nefoho. Jɨje ife yo'mayoso mokoho'nawe'ne sɨkuno m'maho. Kɨko nakwoe honɨngkano hungkunomo mtɨhupeelokuno. 11Ose ulahonɨngkofi kako ole ulɨmento, Oso hwe kako wopɨngo nɨmokonto ntohoho, Kɨko nolɨkafohoji jɨje ife yo'mayoso hu'memahoji hano mpano. Ose ntiso'nefoho. 12Ose ulahonɨngki hofɨko ulohonɨmentohofi, Tɨhwoe a'amuhwo kilisoto. Jɨje ife yo'mayoso mahoji mpano eso. 13Ose ulahonɨngkofi oso hwe wopɨngo imo'nɨmentiso sohwo kako Jisas kakoe yofeso huno muyo hweho. Hwapɨngoso oso hopo sopo Jisas kako oso hwe huhwo sohumo wopɨngo umokonto a'amu pi'nɨngo engo somo uhwononto kako komo'no ulɨko'ma'mentisofoho.

14Hwangku sohonta Jisas kako oso hwe huhwo sohumo Anɨtuye tajo ango engo somo tɨpɨhwononto ulɨmento, Kɨko upa'nyo. Wopɨngo nto imo'nɨngkino hwosoho. I kɨko honɨngkano wonyoso apa'no yohotoho. Nom'ne tango engo mɨkunɨmposo ku'manoho. 15Ose ulahonɨngki oso hwe huhwo sohwo kako nowento a'amu Jutafe hwe engo sohwamo ulɨmento, Oso hwe ngkimo wopɨngo nɨmokumaso sohwo Jisasɨyoho. Ose ulɨmentisofoho. 16Oso hohosohonta a'amu Jutaso hofɨko Jisasɨmne'no wonyo ulohofano lontɨfi oso hiso'no hungkuno loma'mentohofofoho. Hwapɨngoso Jisas kako oso hwe wopɨngo umokumentisoso sɨkuno iyoho humayo somo imentisofoho.

17Hofɨko Jisasɨmo yoka hungkuno ulahonɨngkofi Jisas ulɨmento, I nje Mpohwo kako sɨkuno huhwo huhwi a'amumo wopɨngo'nohini ne'no ulohofɨwo'nɨngkiso hweho. Kako usijo'no mofosyohumayo hweho. Oso pa'nyo sɨkuno huhwo huhwi ngko huhwo'ni a'amumo wopɨngo ulohofɨwo'nɨngkohe hwo'nyoho. Ose ulɨmentisofoho. 18Jisas ose ulɨmentiso so'no a'amu Jutaso hofɨko Jisasɨmo wofonjosyano lontɨfi imentohofofoho. Hwapɨngoso hofɨko huno ole syafɨhu'mentohofi, Jisas kako sɨkuno iyoho humayo somo syoho iwo'nɨngkiso hweho. Oso'nohini'maho. O'o, kako Anɨtu nje Mpohweho naliso'manji kako huno ole syofɨsyalofoho. Ngko Anɨtu'nji afa hwo'nyoho. Ose syafɨsyontɨfi hofɨko Jisasɨmo wofonjosyano lontɨfi imentohofofoho.

Anɨtuye Hwomu sohwo kakoe syoho iyo so'ne kako yokumpohn'nyo hi'njo hweho.

19Jisas a'amu Juta huhwa sohwamo ulɨmento, Hungkuno nehopi'nohini waselɨmonne'no yohono. Ngko Anɨtuye Hwomu sohwo'ni nje huno mta'ni ngko yo'mayoso siki mimnehono. O'o, yo'mayo nje Mpohwo yalokunjo somo uhwononji ngko yalokweno. Yo'mayo Mpohwo yonteso Hwomu sohwo kako iwo'nɨngkohoho. 20Nje Mpohwo kako sɨmeho engo mɨkunɨmposo Ngkimo ntapɨwo'nɨngkiso so'no kako yo'mayo hopi'nonohino yalokusoso ntɨhwawo'nɨngkisofoho. Oseso yo'mayo ntɨwo'nɨngkisoso ngko yalokweno. Olo syoho we'e imale somo sekwo tɨmo uhwonɨmalofo sohwasi hwangku Anɨtu kako syoho engo olo syoho we'e homo lomo hwofilo'nnyoso ntapɨhwoso'no sekwo uhwonɨngkuji sekwo yomo uyantɨfeho. 21Mpohwo kako a'amu poyo pe'nyo somo ulɨkafonte sohwo songo apa'no umokuwo'nɨngkiso hweho. Oseso Ngko huhwo'ni a'amu fehohnjo poyo pe'nyo somo ulɨka'mo lɨmeso i ulɨka'monnoho. 22Olohonta Mpohwo Anɨtu kako a'amufe honɨngkano somne'no wopɨngofoho wonyofoho mujo hweho. O'o, kako oso syoho hiso kakoe Hwomu sohwo'nɨmo ntapmmentisofoho. 23Oseso hwe moya'mi hopi'nonohinoso hofɨko Mpohwoe yofe ho'nomawo'nɨngkohofo hopaso hofɨko kakoe Hwomu sohwo'niye yofe hi ho'nonɨmapitnne'ento syoho hiso ntapmmentisofoho. I oso'no a'amu nje yofe moho'nonɨmayo'njo hwo'manji hofɨko nje Mpohwo nɨhwatɨmentiso sohwoe yofe hi moho'nomayo'njofoho.

24Ose ulɨkwato lohofonto ole ulɨmento, Ngko nehopi'nohino waselɨmonne'no yohono. A'amu hofɨko nje hungkunomo upa'nɨngkuji Anɨtu nɨhwatɨmentiso sohumo sɨmeho hi'ntnnono uyɨkuji hofɨko songo ne'no wopɨngo humayo'ne hi'njofoho. Hwangku hofɨkoe yahino somne'no hungkuno ikwolofo angkuhwafo sopo m'mofapitnnefoho. Hofɨko poyo pe'nyo yahino somo hwotoho fentɨfi songo ne'no humayo yahinoso nto tɨpema'mentohofofoho. 25Hungkuno nehopi'nohini selalokweno. Oso sɨkuno u'mofapmmonto imentiso sohwi nto i'mofapohoho. Oso'no olohonta a'amu poyo pe'nɨmentohofoso hofɨko Anɨtuye Hwomu sohwo'niye mango mta'ni nje hungkuno upo'nantɨfeho. Oso a'amu hiso oso hungkuno homo somo sɨmeho uyɨkuji'manji hofɨko songo ne'no nohumantokutnnefoho. 26Nje Mpohwo kako songo humayo hwapɨngo sohwo kako kakoe Hwomu sohwo'nnonji songo fosyohumayo'ne hwapɨngo nɨmokumentisofoho. 27Oseso Anɨtu kakoe Hwomu sohwo'nɨmo oso syoho a'amufe yahino somne'no wopɨngofoho wonyofoho ujoso ntapmmentisofoho. Hwapɨngoso Ngko A'amufe Hwomu nɨhwosopo'mentiso hwo'nyoho. 28Sekwo olo hungkuno lomne'no yomo ikutoho. Hwangku nom'ne sɨkuno imo'nyo sohwi i'mofapɨhwoso'no a'amu poyo nto pe'nontɨfi pi'nɨmomo wotofoso hofɨko nje mampaho wonupo'nantɨfeho. 29Hofɨko nupa'nɨngkuji apa'no songo wolɨkofantɨfeho. A'amu yahino wopɨngo imotofoso songo ne'no nohumantokutnnefoho. A'amu yahino wonyo imotofoso tohino engo tɨpemapitnnefoho.

Anɨtu kako kakoe hwomufe hwapɨngo so'no ujo ehontojwahumentisofoho.

30Ngko a'amufe yahino somne'no yano milofɨhwajiyo syoho imeso nje huno mta'ni mimnehono. O'o, ngko nje Mpohwoe hungkunomo upa'nɨ'mo osomnohini ngko tɨfi inɨngka'mo ngko a'amumo yano milofɨhwajiyoso nto'nohino uyɨmonnoho. Hwapɨngoso ngko nje huno mta'ni uyɨmonji'maho. O'o, nɨhwatɨmentiso sohwo yo'mayo umo'nososo uyɨmonnoho.

31Ngko sekumo ngkine'no hungkuno selɨ'me'no sekwo huno ole wosyofɨsyantɨfeho. Kakoe hungkuno nehopitɨkeno. Hwasyo kolalofoho. Ose wosyofɨsyantɨfeho. 32I oso'no nom'nihwo nje Mpohwo oso hungkuno ngkine'no selokweso kako huhwo nje hwapɨngo so'no setɨhwalofoho. Oso ngkine'no setɨhwalokusoso ngko huno niyohoho, nehopeho. 33I nom'ne hungkuno upa'nyo. Oso hwe Joun A'amumo Mijo Kiyoma'mojo sohwoe hungkunomo sekwo upo'nane'entɨfi kakiyepono sekwoe a'amumo uhwatɨmentohofofoho. Oso hwe huhwo'nji nje hwapɨngo so'no hungkuno nehopi nto selɨmojofoho. 34Ngko hwaho loponjo hwe sohwoe hungkuno ngkine'no nje hwapɨngo so'no selɨmentiso so'no ngko huno pi'nɨngo maniyantofiyoho. I oso'no sekwo ngkimo sɨmeho ntapɨfitnne'no sekwoe wonyomjo tohino somta'ni isɨhutofosemayo'ne Jounɨye hungkunoso huno sefohotofo'ne selalokweno. 35Joun sohwo kako sikiloho hopo imo'nonto sekumne'no pomponaho losesiyo'ne hweho. Sekwo kakoe pomponahopo we'enepi wohumano lontɨfi sɨmonyo imentohofofoho. 36I oso'no olohonta nom'ne wopɨngo Jounɨmo hwofilo'nnyoso nje hwapɨngo so'no losetɨhwalofoho. Oso hiso nje syoho wopɨngo Mpohwo ntapmmentiso a'amu miyɨwo'nɨngkiyohofoso yalokweno. Oso syoho hiso sekwo uhwonɨngkuji nje hwapɨngo so'no huno waseyono. Mpohwo Anɨtu lɨhwatɨmentiso hweho waseyono. 37Nje Mpohwo nɨhwatɨmentiso sohwo sekwo kakimo muhwonyo'njo ko yontɨfi kakoe mampaho somo mupa'nyo'njo ko yahonɨngkofi kako huhwo nje hwapɨngo so'no nto setɨhwamentisofoho. 38Kakoe hungkunoso sekwoe sɨmeho mo'mo maseuyoho. Hwapɨngoso sekwo Anɨtu nɨhwatɨmentiso sohwo'nɨmo sɨmeho hi'ntnnono montape kuyoho. 39Sekwo huno ole syofɨsyalokwofo. Nakwo Anɨtuye hungkunomo sɨkuno huhwo huhwi atofo lɨwo'nasoso nakwo songo ne'no humayo'ne wotɨpemantanoho. Ose syafɨsyontɨfi sekwo oso hungkuno homo somo hafɨhafe tɨpewo'nɨngkohofofoho. I oso'no oso hungkuno hiso nje hwapɨngo so'no ko lɨjwaofɨwo'nɨngkisoso 40sekwo ngko songo ne'no wonyoangkafo humayo hwapɨngo sohwo'nɨmo nɨ'mayo so'no nakwolaho lɨwo'nɨngkohofofoho. Oso'no sekwo songo ne'no humayoso matɨpmmopiyo hwasoho.

41Olo hungkuno loso sekwo nje yofe woho'nonɨmantɨfe'no maselalokuyohono. 42O'o, ngko sekwoe yahino somne'no huno niyohoho. Sekwo Anɨtumne'no Nakwolaho lalokwofo. 43Ngko nje Mpohwoe yokumpohn'nyo'nji noponji se'ma'mentoheso, Ngko Anɨtu mta'ango hwo'nyoho selɨmentohefoho. I oso'no sekwo nje hungkunomo moho'nonɨmaso hwasoho. I hwe nom'nehwo kakoe huno mta'ni se'mahwosi kakoe yokumpohn'nyo'nji yo'mayoso ihwoso'no sekwo kakoe hungkunomo woho'nomantɨfeho. 44Sekwo sekwoe yofe ho'noma'nɨwo'nɨngkohofofoho. I oso'no sekwo sekwoe yahino somne'no Anɨtu kako huno pipi kuyalofoho eso huno mosyafɨsiyo'njo liyalokwofo. O'o, kakoe syohofoho lalokwofo. Oso hiso'no sekwo Anɨtu ne anga'nohino sohumo sɨmeho hi'ntnnono muyɨfitnnehofo. 45Tɨfi no'mo sekwoe honɨngkano somne'no hungkuno ikwolofo'ne sopo ngko nje Mpohumo sekumne'no mulɨmnehono. O'o, Mouses sekwoe hungkuno ikwolofo'ne sopo sekwoe wonyo somne'no Mpohumo ulonefoho. Hwapɨngoso sekwo huno ole syofɨsyalokwofo. Nakwo Mousesɨye honɨngkano hungkunomo ito'no inɨngkowalokuhwono. Oso'no nakwo songo ne'no wonyoangkafo humayo so'no wotɨpemantanoho. Ose syofɨsyalokwofo. 46I oso'no sekwo Mousesɨye hungkunomo sɨmeho hi'ntnnono nehopi uyontɨfijontentesi sekwo nje hungkuno homo somo sɨmeho hi'ntnnono nontapɨkutnnesohilo. Hwapɨngoso Mouses kako ngkine'no hungkuno mtɨ'mokumentisofoho. 47Oso hungkuno Mouses ifalifaliyo mtɨtmokumentiso somo sekwo nto'no minɨngkayo hwasɨ'manji sekwo nje hungkunomo sɨmeho hi'ntnnono pipi wotɨpeentɨfito. Awonoho. Jisas ose ulɨmentisofoho.